Сентябрӗн 27-мӗшӗнче ача садӗнче ӗҫлекенсен уявӗ. Садра ӗҫлекенсен уявӗ ҫамрӑк уяв. Ҁапах та уява сентябрь вӗҫӗнче уявласси йӑлана кӗчӗ.  Апла пулмасар, ача-пӑчана тӗрӗс -тӗкел ҫитӗнтерсе ҫын тӑвасси, чӑн та, питӗ йывӑр ӗҫсенчен пӗри пулса тӑрать.

     Ҫак уява халалласа аслӑ ушкӑн ачисем Лилия Ильинична воспитательпе  музыка залне пухӑнчӗҫ.  Уява вӗсем чӑтӑмсӑррӑн кӗтрӗҫ: тӗрлӗ сӑвӑ-юрӑ вӗренчӗҫ, парнесем хатӗрлерӗҫ. Чечексемпе капӑрлатнӑ илемлӗ залта ачасем  Вера Степановнӑпа юрӑ хыҫҫӑн юрӑ шӑрантарчӗҫ,  сӑвӑсем каларӗҫ. Артистенчен кая мар, Лера В., Дима Г., Макар Г. пӗчӗк спектакль выляса пурне те тӗлӗнтерчӗҫ.  Ача садӗнче иккӗмӗш ҫул  музыка ертӳҫинче ӗҫлекен Вера Степановна ӗҫтешсен ячӗпе ҫырнӑ сӑвӑ вара пурин кӑмӑлне те тыткӑнларӗ.

     Уяв вӗҫӗнче ачасем хӑйсен юратнӑ воспитательсене,  садик ӗҫченӗсене хӑйсем тунӑ илемлӗ открыткӑсем парнелерӗҫ. Кӗҫӗн ушкӑн ачисем кашни ӗҫчене салам сӑмахӗсем каласа тӗрлӗ чечексем парнелерӗҫ. Уяв вӗҫленсен пурте асӑнмалӑх сӑнӳкерчӗсем  ӳкерӗнме кӑмӑл турӗҫ.